Abahinzi b’icyayi  mu murenge wa Karambi, akarere ka Nyamasheke bibumbiye muri  koperative  COTHEGA baravuga ko imyaka 13 gusa bamaze muri ubwo buhinzi ibarutira kure iyo bamaze yose bahinga bihinga kuko ntacyo basaruraga,bamwe basuhukira mu bindi bice by’igihugu ngo barebe ko babaho n’ayo mahaho ntibayacyure yose,ubu bakaba bakirigitira ifaranga ry’icyayi  mu miryango yabo.

Bashimira cyane umukuru w’igihugu Paul Kagame wabahinduriye ubuzima bigaragara kuko mbere y’icyo cyayi nta wari guturuka ahandi ngo abagereho,kwaba ukuhatura cyangwa kuhasura kuko umuhanda uwugeramo ubu icyo gihe ngo wari nk’akayira gahanamye.

Ntawagiraga amazi cyangwa amashanyarazi,gushyira abana mu mashuri byari umugani, abana bakuze babona ababyeyi babo bombi bakaba mbarwa, kuko abenshi bakuraga bumva ngo ababyeyi basuhukiye mu majyepfo kubahahira,ntibazanabone bagaruka,bakababura babafite.

Bavuga ko ubwo umukuru w’igihugu yasuraga icyari komini Gatare  muri 2005,abaturage bamutakambiye,bamubwira ko nta buzima bafite, abemerera kubuhindura akoresheje ubu buhinzi bw’icyayi,muri 2010 hatangira inzira zo kugihinga, banahabwa inguzanyo na BRD ngo imirimo yihute, icya mbere cyeze babura aho bakigurisha kuko nta ruganda bagiraga.

Icyo gihe n’ubundi batakambiye umukuru w’igihugu ko bakijyana kugitunyiriza mu ruganda  rwa Gisovu,mu karere ka Karongi. Kuba  kure cyane,kinajyaniwe rimwe nimugoroba kiriwe cyangirikira aho bagisoromeye,kigahira mu nzira,kikagerayo ntacyo bakiramira, kikaba igihombo gisa. Bavuga ko yabumvise vuba abaha uruganda rwatangiye gukora muri 2018,na rwo ubu  ngo rwababereye inzira nyayo y’impinduka mu iterambere.

Mbonyumufasha Emmanuel  w’imyaka 45 uvuga ko yatangiye gusuhuka afite imyaka 17 kubera ubuzima bubi babagamo,uyu munsi akaba yicaye hamwe n’umuryango we yinjiza buri kwezi ay’icyayi akiteza imbere atirutse imisozi y’igihugu cyose ashaka imibereho,avuga ko ari umuhamya w’ubuzima babagamo mbere n’ubwo barimo ubu.

Ati’’ Tuvuye kure pe! Burya koko ribara uwariraye. Ugeze aha ukabona ukuntu hakeye,imisozi itatswe n’icyayi cyiza,dusirimutse,hagendwa,wakwibwira ko ari ko byahoze. Twari inyuma y’umurongo w’ubukene, kwambara inkweto ari igitangaza, uteka ibijumba ukajya ubiyora utamira  nk’uyora ibishyimbo bitewe n’uko twabaga tungana. Rwose twari habi cyane.’’

Yarakomeje ati’’ Nkanjye wabunzaga amaguru ndi umusore ngo ndebe ko nabaho, naragondagonze akazu k’amafuti,k’amategura ,nkabura n’inkwano ngashaka uwo ndakoye, uyu munsi ndi umuhamya w’impinduka mu iterambere twazaniwe na perezida Kagame.’’

Avuga ko mu cyayi amaze kwikuriramo inzu nziza, amazi n’umuriro aho,mu gihe mbere kumva ngo umuntu afite amazi mu rugo byari igitangaza. Aherutse kugura inyana nziza akayikwa umugore babyaranye abana 5, yoroje indi nka nyina,agira n’izo asigarana. Abana bariga neza, mu biruhuko bakarya neza. Byose ngo biturutse kuri iki cyayi.

Yamfashije Marceline,uvuga ko yagize ingorane zo guterwa inda akiri muto n’umugabo wubatse,bikamukura mu ishuri yari ageze mu wa 5 w’ayisumbuye, iwabo bakamwirukana,wa mugabo akamushuka akamutera indi, muri bwa buzima bubi bwo kwibana n’abana 2 undi musore akamubeshya ko agiye kumutwara akamutera indi, avuga ko iyo icyayi kitaza no kwiyahura byari gushoboka.

Ati’’ Muri iyo mibabaro yose ubuzima bwaranshaririye,ngira amahirwe icyayi kiraza kuko nabehswagaho no guhingiririza, njya gusabayo akazi, bampa ako kujya nikorera imbuto zacyo zijyana mu mirima, hashize igihe nanjye bampa umurima,nywitaho,umpindurira ubuzima. Nubatse inzu nziza mbanamo n’abana banjye, ntawe ntegera amaboko,nditunze mbikesha icyayi nihingiye.’’

Aba,n’abandi,bavuga ko banagize amahirwe yo kubona Karambi Vision SACCO na SACCO yabo nka’abahinzi,zombi zibigisha kwizigamira, bakaguza bagakora imishinga y’iterambere, bakishimira ko ahubwo abaturutse ahandi baza gushakira ubuzima iwabo,mu gihe nka 80% by’abawutuye babaga barasuhutse.

Umuyobozi wa COTHEGA Mukantagungira Jeannette,yemeza ukuri kw’aba bahinzi,n’impinduka icyayi cyabazaniye. Ati’’ Gushimira perezida Kagame ni byo ,ni ukuri,kuko aho atuvanye n’aho atugejeje harivugira.’’

Avuga ko kuba imisozi yaho itamirijwe icyayi, uruganda rwacyo ruhari,santere z’ubucuruzi zishyushye,amashanyarazi n’amazi biri hose,bose bambaye inkweto,n’ibindi bashima bitizanye.

Ati’’ Rwose tuvuye mu bwigunge bukabije n’ubuzima bubi,turi aheza. Abana barakura babona ababyeyi babo,si ko byahoze. Twongeye kumushimira amafaranga 5% yatwongereye ku nyungu iva mu cyayi,na yo yahinduye byinshi. Tumeze neza,inguzanyo ya BRD turayishyura neza, SACCOs zirahari turazigama tukanaguza tugakora imishinga, turatanga mituweli tukivuza,n’ibindi ntarondora.’’

Umunyamabanga nshingwabikorwa w’uyu murenge,Uwizeyimana Emmanuel,na we yemeza izi mpinduka,akavuga ko ubu abaturage bagera ku 4500 babona akazi buri kwezi, mu ruganda no muri koperative, amafaranga akabagirira akamaro. Mbere ntibyabagaho,umwana yarangizaga ayisumbuye yigendera,ubu arahaguma kuko aba ahizeye akazi,kuko n’abatagihinga bakabona.

Bamaze kwizigamira arenga 800.000.000 muri SACCOs zabo, n’inguzanyo zatanzwe zirenga 800.000.000 yose,ari mu mishinga y’iterambere. Ayo ntibari kuyabona mu myaka yahahingwaga mbere.

Ati’’ Bimeze neza cyane rwose. Turabasaba gukomereza aho,bakongera icyayi mu bwiza no mu bwinshi kuko nk’uko amakuru dukura mu ruganda abivuga,  icyayi cyacu kiri ku rugero rwo hejuru mu buryohe,gikunzwe cyane ku rwego mpuzamahanga. Ntibasubire inyuma,kandi ayo babonye bakomeze bayakoreshe neza n’ibyo batarageraho bazabigereho vuba.’’

Iyi koperative ifite abanyamuryango 3206,bagihinga ku buso bwa hegitari 946, umuyobozi wayo Mukantagungira Jeannette akavuga ko,kuba mu myaka 3 gusa  ishize, bamaze kwigurira imodoka 4, barakoze umuhanda wabagoraga kugera mu cyayi, n’ibindi bigejejeho, bibaha icyizere ko imbere ari heza kurushaho.

 @Rebero.co.rw